ԱՆԿԱԽՈՒԹՅԱՆ ՏՈՆ

Հայտարարում եմ
Օ՜, ոչ, խնդրում եմ
Գործուղում տվեք՝ ապագա գնամ…
                                                    Պարույր Սևակ

Շնորհավոր տոնդ, հայրենի՛ք իմ անկախ:
Անկախությունը միշտ եղել է հայի երազանքը, դրա համար էլ հայն իր մանկանը կոչել է «Ազատ»…
Հայրենիք իմ սիրուն, թո՛ղ խաղաղ լինեն քո բոլոր արշալույսները, կապույտ ու անամպ քո երկինքը, թո՛ղ ժպտան բոլոր հայերի խորունկ աչքերը, թո՛ղ քո մասին գրվեն ամենալավ երգերը և դառնան օրհնանք քո ճանապարհին:
Պատմության ու քաղաքակրթության շավիղներով հպարտ ապրած մեր հայրենիքը եղե՛լ է, կա՛ ու կլինի՛:
Նա պետք է ընդմիշտ իր ազատ տեղն ունենա այս երկրագնդի վրա ու այս արևի տակ,իսկ մենք պարտավոր ենք սրբորեն պահել նրա ազատությունը՝ երիզելով նրա ճակատը դափնիներով, հասցնել գալիք սերունդներին՝ անսալով դարերի խորքից եկած նրա ձայնին:
Մենք քո ժամանակակիցն ենք, երկի՛ր իմ անկախ: Մենք միասին ենք հասակ առել ու միասին էլ կերտելու ենք մեր ապագան.
Ես էլ քայլեցի քեզ հետ հավասար,
Քեզ հետ մեծացա ու հասունացա,
Եվ հասակակից դարձա ակամա,
Դառնալով վկան քո նոր պատմության ու վերածնման:

               Քե՛զ խաղաղություն…
Թո՛ղ գիշերներդ միշտ խաղաղ մթնեն,
Իսկ առավոտի նոր բացվող օրը
Քեզ երջանկության շողեր պարգևի
Ու դու զորանաս, իմ մա՛յր հայրենիք,
Ու նոր շիվեր տաս այս արևի տակ
Ու զարթոնք ապրես հավերժ, հավիտյան:
Մենք՝ երկրի վաղվա տերերս, ապրում ենք այս երկրում՝ հայացքներս դեպի այն ապագան, որով ապրում էր մեծն Չարենցը:
Մենք վստահ ենք, որ հայ ազգը, ով եկել է դարերի խորքից , ապրելու է դարեդար և բարձունքից է նայելու քաղաքակիրթ աշխարհին իր լիիրավ տեղը զբաղեցնելով նրանց շարքում՝ սրտում ունենալով չարենցյան պատգամը.
Մենք եկել ենք դարերից ու գնում ենք հաղթական, դեպի դարերը նորից, դեպի վառվող ապագան…

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով